ಕೇರಳದ ಪವಿತ್ರ ಶಬರಿಮಲೆ ಕ್ಷೇತ್ರದಲ್ಲಿ ಭಕ್ತರ ಭಕ್ತಿಭಾವದ ಕೇಂದ್ರವಾಗಿರುವ “ಪತಿನೆಟ್ಟಂಪಡಿ” ಅಂದರೆ 18 ಪವಿತ್ರ ಮೆಟ್ಟಿಲುಗಳಿಗೆ ಅಪಾರ ಆಧ್ಯಾತ್ಮಿಕ ಮಹತ್ವವಿದೆ.
ಪ್ರತಿ ವರ್ಷ ಲಕ್ಷಾಂತರ ಅಯ್ಯಪ್ಪ ಭಕ್ತರು 41 ದಿನಗಳ ವ್ರತಾಚರಣೆ ನಂತರ ಇರುಮುಡಿ ಹೊತ್ತು ಈ 18 ಮೆಟ್ಟಿಲುಗಳನ್ನು ಏರಿ ಸ್ವಾಮಿಯ ದರ್ಶನ ಪಡೆಯುತ್ತಾರೆ.
ಆಧ್ಯಾತ್ಮಿಕ ನಂಬಿಕೆಯ ಪ್ರಕಾರ, ಮೊದಲ ಐದು ಮೆಟ್ಟಿಲುಗಳು ಮಾನವನ ಪಂಚೇಂದ್ರಿಯಗಳನ್ನು ಸೂಚಿಸುತ್ತವೆ. ಮುಂದಿನ ಎಂಟು ಮೆಟ್ಟಿಲುಗಳು ಕಾಮ, ಕ್ರೋಧ, ಲೋಭ ಸೇರಿದಂತೆ ಮಾನವನ ದುರ್ಗುಣಗಳನ್ನು ಜಯಿಸುವ ಸಂದೇಶ ನೀಡುತ್ತವೆ.
ಇನ್ನು ಉಳಿದ ಮೆಟ್ಟಿಲುಗಳು ತ್ರಿಗುಣಗಳು, ಜ್ಞಾನ ಮತ್ತು ಅಜ್ಞಾನವನ್ನು ಪ್ರತಿನಿಧಿಸುತ್ತವೆ ಎಂದು ಪಂಡಿತರು ವಿವರಿಸುತ್ತಾರೆ.
ಭಕ್ತರ ನಂಬಿಕೆಯಂತೆ, ಈ 18 ಮೆಟ್ಟಿಲುಗಳನ್ನು ಏರುವುದು ಕೇವಲ ದೇವಸ್ಥಾನ ಪ್ರವೇಶವಲ್ಲ… ಅದು ಆತ್ಮಶುದ್ಧಿಯ ದೈವಿಕ ಪಯಣವಾಗಿದೆ.
